Aqliy salohiyat va jismoniy quvvat uyg’un bo’lgan jamiyatda rivojlanish, har tomonlama o’sish bo’ladi. Talaba yoshlarda ana shu mezonning ustuvor bo’lishi turli yo’sindagi ma’rifiy va ma’naviy tadbirlarni tizimli ravishda o’tkazish bilan bog’liq.

Universitetimizning "Madaniyat saroyi"da o’quv yili yakunida "QUVNOQLAR VA ZUKKOLAR" dasturining tashkil etilgani ham ana shu ezgu niyat va ishonchning hosilasidir. Ma’lumingizkim, universitetimizning "TARG’IBOT" jamoasi bir necha yillardan beri "QUVNOQLAR VA ZUKKOLAR" ko’rik - tanlovlarida ishtirok etib universitetimiz nufuzini munosib tarzda himoya qilib kelmoqda.

Universitet tomonidan joriy yilning 17-iyun kuni "TARG’IBOT" jamoasini taqdirlash marosimi bo’lib o’tdi. Unda universitet rektori B.Mirzayev va prorektor R.Choriyev barcha fakultet dekanlari va bo’lim boshliqlari bilan ishtirok etishdi. Ot o’rnini toy bosar deganlaridek, “Targ’ibot” jamoasining izdoshlari bo’lgan yangi jamoa ham o’zlarining intellektual va tomoshabop qobiliyatlari bilan ko’pchilikning e’tiborini tortdi. Barcha fakultetlarning iqtidorli talaba qizlaridan tarkib topgan yangi jamoaning chiqishlari hyech kimni befarq qoldirmadi.

Tadbirda Nurafshon shahridagi  4 - sonli ixtisoslashgan davlat umumta’lim maktabining elliktacha o’qituvchi va o’quvchilari  ham ishtirok etib o’z san’atlarini namoyish etishga muvaffaq bo’lishdi.

Universitetimiz rektori taqdirlash marosimida talaba yoshlarimizga motivasion ruh berish asnosida “Targ’ibot” jamoasini 20 million so’m bilan taqdirlangani nishonini taqdim etdi.

Talabalarning xursandchiligi cheksiz edi. Yangi jamoa bu muvaffaqiyatlar bayrog’ini qo’ldan bermaslikka ahd qilishdi. Konsert dasturi tantanavor va ko’tarinki ruhda yakuniga yetdi.

Universitet matbuot xizmati