21 - aprel kuni Volgograd davlat agrar universiteti tomonidan tashkil etilgan “Stalingrad: qurolli qardoshlik” mavzuidagi davra suhbatida “Gumanitar fanlar” kafedrasi mudiri prof. Sh.M. Oʻljayeva oʻzining “Oʻzbek jangchilarining Stalingrad jangida koʻrsatgan jasoratlari”, katta oʻqituvchi D. Ahmedova “Oʻzbek xalqining Stalingrad jangida fashizm ustidan qozonilgan gʻalabaga qoʻshgan hissasi” nomli ilmiy maʼruzalari bilan ishtirok etdi.

Bu kabi ilmiy muloqotlardan maqsad avvalo, madaniyatlar muloqotiga asoslangan koʻp madaniyatli taʼlim makonini shakllantirishdir. Shuningdek, Stalingrad jangida va Ikkinchi jahon  urushida barcha sobiq SSSR xalqlarining fashizm ustidan qozonilgan gʻalabaga qoʻshgan hissasi haqidagi jasoratlarini yod etish, yoshlarni vatanparvarlik ruhida tarbiyalashda tajriba almashish ilmiy davra suhbatining mazmunidir.

Oʻzbekiston xalqlarining Stalingrad jangidagi gʻalabaga qoʻshgan hissasini oʻrganish, avlodlar davomiyligi anʼanasini saqlash, urush ishtirokchilari xotirasini abadiylashtirish bugungi kunda muhim masaladir.

Universitet matbuot xizmati