«Irrigatsiya va melioratsiya» kafedrasi dotsentlari Аdham Mamataliyev va Dilbar Аbduraimova Toshkent viloyati Nurafshon shahridagi 19 va 32-maktablarga tashrif buyurishdi. “Kafedra-maktab” hamkorligi doirasidagi uchrashuvlarning ko‘proq maktab o‘quvchilarining qiziqishlari va takliflari asosida tashkil qilinayotganligi sababli, bu safargi uchrashuv ham maktab o‘quvchilarining o‘tgan uchrashuvdagi takliflari asosida tashkil qilindi va ularga Universitetimizdagi bakalavriat taʼlim yo‘nalishlari to‘g‘risida maʼlumot berildi.

Dastlab Universitetimiz o‘qituvchilari tomonidan olib borilgan esdalik sovg‘alari maktabga taqdim qilindi. So‘ngra, maktabning bitiruvchi sinf o‘quvchilari to‘plangan zalda uchrashuv boshlandi. Uchrashuvda Universitetimizdagi taʼlim yo‘nalishlari, bu yo‘nalishlar boʼyicha qanday kasb mutaxassislari tayyorlanishi, qaysi fanlarga chuqurroq eʼtibor berilishi kerakligi, o‘quv jarayonining tashkil qilinishi va talabalar uchun yaratilgan sharoitlar to‘g‘risida prezentatsiya taqdim qilindi. Tadbir davomida Universitetimiz to‘g‘risidagi videorolik ham qo‘yib berildi.

Uchrashuv maktab o‘quvchilarida Universitetimizga nisbatan katta qiziqish uyg‘otdi. Buni o‘quvchilar tomonidan berilayotgan ko‘plab savollarda ham ko‘rish mumkin bo‘ldi. Аjabmaski, bunday uchrashuvlar natijasi bu o‘quvchilardan bir qanchalari yaqin vaqtlarda institutimiz talabasi va so‘ngra kelajakda qishloq va suv xo‘jaligi sohasi uchun yetuk mutaxassislar bo‘lib yetishishiga turtki bo‘lsa. Negaki, kelajak bugundan boshlanadi.

"TIQXMMI"  MTU matbuot xizmati